Çaste poetike me poeten:-Arsinoi Zenko KALLXO

Kur një nënë qan mbi djalin

——————————————————-

Sot një nënë qan mbi djalin,

dhe qielli hesht, i rëndë, i zi,

një dorë kriminele i preu jetën,

një ëndërr mbeti pa agim.

Ishte i ri, me botën përpara,

me një mijë rrugë për të shkelur,

por plumbi i një zemre të zezë

ia mori jetën pa e pyetur.

Kush na e ruan jetën sot,

kur njeriu vret njeriun pa mëshirë?

Kur një nënë kthehet në shtëpi

me një arkëmort, jo me bir?

A ka më siguri kjo botë,

apo frika është bërë ligj?

Kur një djalë del për të jetuar

dhe kthehet vetëm në një kujtim?

O nënë, mos e ul kokën,

edhe pse shpirti të është shuar;

djali yt s’vdiq vetëm atë natë—

me të, një botë e tërë ka vajtuar.

Dhe nëse drejtësia vonon,

le të mos vonojë ndërgjegjja;

se gjaku i pafajshëm nuk tretet,

ai bëhet britmë përmbi heshtjen.

Sot qan një nënë mbi djalin,

nesër mund të qajë një tjetër…

Prandaj ta ruajmë jetën e njeriut,

para se të mbetet veç një emër.

E shkreta nënë….

/QendraPresss/