E mërkura poetike me poeten: Brikena Ceraja BEKA

Porta ishte ngrirë nga acari

——————————————–

Nanë, mbrëmë as në ëndërr nuk të pashë

E ulur te shkalla e shtëpisë së vjetër

Aty ku me buzëqeshje e plot dashuri

Çdoherë na prisje kur ktheheshim nga shkolla.

Vrapova ta hap portën e shtëpisë

Por shkalla ku na prisje mbante akull përmbi.

Doja të ta shoh buzëqeshjen

E ta dëgjoj zërin e ëmbël

Që vetëm dashuri lëshonte

Por porta ish ngrirë nga acari.

E kujtoja ditën kur ike

Të pashë kur qetë e ndërrove dhomën

Dhe të mbuluam me lule.

Nanë, sot nuk gjeta as lule,

Vrapova t’i këpus 19 karafila,

Për ta kujtuar pushimin tënd.

As lulet nuk i gjeta, nanë

Ishin mbyllë të gjitha portat nga acari

Në shkallën e shtëpisë së vjetër pashë vetëm diellin

Që m’i hapi qepallat me lot.

/www.QendraPress.com/