Çaste poetike me poeten;-Adelina Dardha HASKAJ
Edhe pak,
—————-
dhe do gjesh terren të mjaftueshëm
në medyshjen tënde.
Këmba, dora, mendimi yt
do të zënë vend,
beson në çeljet dhe ardhjet e agimeve,
ndryshe nga ngërdheshjet
dhe tulatjet.
Ti bën para,
hedh hapa të sigurt
për t’ia dalë ..
fundja, ç’të mbeti tjetër
për të bërë
në përditshmërinë tënde?
Ti lëviz kur shkreptimat godasin,
gjakosesh për t’ia dalë
plagëve të fashuara me dritë.
Kështu je ti:
e plotë për të mos mbetur
gjysmë në një gotë të boshatisur,
e zemëruar për mospërfilljen
që i bën mallit,
kur brendia jote zien
si asfalti i zi
në një ditë gushti,
dhe në kalendar mungojnë
fletët e vjeshtës ..
asaj vjeshte
që s’e pe kurrë
me ngjyra.
/QendraPress/
