Kurti me 17 persona tjerë të kabinetit i harxhuan 124 mijë euro për gjashtë muaj, 55 mijë vetëm për dreka

                                    Mbi 120 mijë euro është totali i shpenzimeve për gjashtë muajt e parë të këtij viti, nga kryeministrit Albin Kurti së bashku me kabinetin e tij politik që përbëhet nga 17 persona.Bazuar në të dhënat që ka siguruar Telegrafi përmes qasjes në dokumentet publike, kryeministri Kurti së bashku me kabinetin e tij për gjashtë muaj shpenzuan plot 124 mijë e 639 euro.Këto para u harxhuan për mëditje gjatë udhëtimeve zyrtare, telefon, akomodim, karburant për vetura, si dhe për bileta të udhëtimit e dreka.Vetë kryeministri Albin Kurti nuk ka marr asnjë cent për mëditje të udhëtimeve zyrtare e po ashtu as për telefon.Për dallim nga kryeministri, kabineti i tij harxhoi plot 7,811.75 euro për mëditje, dhe 3,753.26 euro për telefon.Para më së shumti u harxhuan për bileta të udhëtimit dhe dreka. Në total shuma e shpenzuar për bileta të udhëtimit është 37 mijë e 760 euro.Nga këto para, kabineti i kryeministrit shpenzoi 32 mijë e 227 euro, ndërkaq Kurti vetëm 5 mijë e 532 euro.54 mijë e 765 euro u shpenzuan në total për dreka nga reprezentacioni i kabinetit të kryeministrit.Për akomodim në udhëtime jashtë vendit kryeministri Albin Kurti së bashku me kabinetin e tij politik shpenzuan 11 mijë e 331 euro.Kurse 9,217.35 euro janë shpenzuar vetëm për karburant të veturave, ku prej tyre 3,372 euro janë shpenzuar vetëm nga kryeministri Kurti.