E diela poetike me poeten:Shqipe Bytyçi

A BIJM‘ SONTE

A bijm‘ sonte, motër

poshtë kambëve të ahut

asht mbramje e mirë sonte

bashkë me diellin me ra

E di, lisi ka nji andërr

ma tha n’vesh mbramë

kur m’puthi prajshëm n’ballë

e frikēn ma mposhti

frikën e mortit

frikën e sopatave t’zeza

e të gurëve t’mexhes që territ rrotullohen

A bijm‘

bashkë me diellin, motër

E ftohtë vje nata

n‘déj s’ka jetë ma

jam lodhë ngricave çdo natë

droj piki midis terri

tue prit diellin me le

pa pá dritën

si përdridhet mishit terrtë

pa pá njat shpresën e rrebelueme

që dimnon gjoksit ahut

e n’sy pranvere, din krye me que

bijm‘ sonte, motër…

ShB, nëntor 2020