E diela poetike me poeten;Mimoza Eliona Osmani

Kujtova …

====================

Kam frikë të avitem, të t’puth tek faqet,

ato janë të buta ,si të jenë sfungjerë,

mbi buzët llokume, kanë mbirë manushaqet,

dhe unë kujtova , se është pranverë…

E s’dua, të të djeg, sythat në lastarë,

sepse ti, je ndryshe nga lulet e tjera,

ty puthja të ndez dyfish me zjarrë,

tek zien mes mallit ,siç zien musht vera.

Ti je lule e ndjenjës ,hëna e praruar,

çerdhe e ëndërrave ku fle pa kujdes…

kam frikë kur të puth mos m’ mbetesh në duar…

Mos thahesh ,thërmohesh,mos tretesh si vesë…

Moza.