E diela poetike me poeten;Nurije Baduni

SPEKTRI I SHPIRTIT

———————————

Nuk më step pasqyra e praruar,

Kur para saj sytë duan të prehen.

Ca tipare të ëmbla shfaqen aty,

E ndjesitë nisin e dëfrehen…

Prek ca thinja ngyrosur tashmë,

E jeta mbrapsht më rikthehet,

Më pëshpërisin kohët me tallaze,

Por…uni nuk rrëmbehet…

Një rrudhë e thelluar aty në një cep,

Mijëra mendime sjellin e ngrijnë,

Vë buzên në gaz e lehtas ju flas,

E sërish ato fëshfërijnë.

Ca pikla me tjetër pigment në faqe,

Më ngacmojnë në pikat e dobta,

Dëshmi e jetës së ashpër në vite,

Që nuk i lakmova.

Fazat dhe jeta ecin krah për krah,

Starti me finishin rrjedhë filmike krijon,

Jeta do më rrudhë e formojë brazda,

Po spektri i shpirtit më rinon.

N. Baduni 13.03.2022