E shtuna poetike me poeten:Anila KRUTI

Mos më vështro gjatë se bëhem vjeshtë  e më ndjek pikëllimi i shirave.

————————————————————————

O varg!

mëngjes im.

Mbrëmje e praruar hëne.

Hyn e del kraharorit tim

Pikë-pikë e bëhesh dritë.

hieroglifi im, shpirt i gjallë ku digjem

endem e lirë në Itakën time.

O varg , o muzë !

Të kam mall

Velë që zgjon kuajt mbi det

faqet m’i bën prush.

Që fëmije kam jetuar me ty

Në xhepin e zemrës të kam pasur diell

që dhimbjet m’i bën poezi .

***

Thënies së vjetër të gjyshes: Mos kërce me këpucë të bardha se nuk është mirë!

Epo unë i thashë kështu :

Dua të kërcej …

Që kur të pashë ty

dua të kërcej me këpucë të bardha

veshur e gjitha me dritë,

me diellin në sy dhe zogjtë në krahë.

Dua të kërcas takat në rrugë.

Të më dëgjojnë të gjithë…

Rrugët t’i bëj re .

Pastaj të rrotullohem në lëndinë.

Të hyj në vjeshtë me ftonj në dorë

Dua të eci rrugëve më të bardha

Dua të çmendem

se të kam ty.

Dua të kërcej gjersa të thyej këmbët

pastaj të të përqafoj

e bashkë të na dalin krahët …