E premtja poetike me poetin:Hamit TAKA 

ÇFAR TE SHKRUAJ

————————————–

Motivet poetike, thonë, janë të rralla,

Në se besnik s’i mbetesh boshtit erotik.

Rreth tij sot vërtitet bota me andralla

Si lufta e Trojës rreth Helenës u vërtit;

Po kjo muza ime për motive nuk vuan,

Ndodh që shkretëtirën me lule e qëndis;

Se edhe Muhametin për hardhinë e mashtruan

I thanë: ferra është mëma e rakisë;

Mund të shkruaj vjeshtës për gjethen e tharë

Që bie si thonjtë e lyer të zonjushës,

Ndoshta e pret me shpresën ta marrë

Një miush i ngratë që endet mes fushës;

Mund të shkruaj për folenë e braktisur

Që ëndrrat i ka larguar prej zëmre,

Dhe rri vështroj si mërgimtar i ngrysur

Shtegtimin e patave me dhembje;

Mund të shkruaj vargje për heshtjen që mban

Mbyllur dëshirat dhe ndjenjat s’i shfaq

Dhe plepin e zhveshur që më rri kaq pranë

Para selvisë së ndrojtur i heshtur, hutaq;

Mund të shkruaj për ditën me ngrice akull,

Për borën si qefin i bardhë mbi varre

Që me vargje sado pak t’ia ngroh gjakun

Në kopshtin e zhveshur hënës kopshtare;

Dhe për gjërat më të thjeshta prozaike

Mund të thur vargje me ritëm e rimë

Dhe në se i mbyllur në një zemër hermetike

Nga kafazi i gjoksit këndoj si kanarinë;

/qendrapress.com/