E shtuna poetike me poeten ;Anila KODRA

BËMË TË JETOJ

————————————

Mos më fol sonte për yjet ,

As për Hënën që vezullon,

Se sheh që mbi male e pyje

Nata si vejushë me të zeza po shkon ?

Jo , as për Diellin mos më trego ,

Mos më thuaj si po shkëlqen,

Por shihe ti që çdo minutë sot

Shkon në heshtje e më nuk vjen .

E mos më fol për erën ti sonte

T’më thuash që dje frynte si e marrë ,

Se mu duk sikur ajo gëzonte

Pse jemi kaq larg e rrimë të ndarë.

S’dua sot fare të të dëgjoj

Për asgjë në botë e gjithësi,

Dua veç pranë të të ndjej ,

Të më vish lehtë si flladi ti .

A e di , ke parë si vjen vala ,

Lehtë bregun e përkëdhel,?

Ja , ashtu të pres në ëndrra

E mes afshit më mbështjell .

Po agimin që vjen qetë-qetë

Dhe terrin e natës largon,

Vallë a e ke parë dhe ndjerë ?

Ashtu eja , s’ke pse shkon .

Ndaj mos fol për yjet në qiell

As për diellin s’të kërkoj,

Eja veç një çast dhe heshtur

Bëmë dhe një herë të jetoj.

Bëmë ti harroj të gjitha

Ditët , vitet gjithë sa kaluan ,

Bëmë të jetoj pak çaste

Të mbeten ditë të paharruara .