Fryma poetike me poetin:Sabit RRUSTEMI 

DËSHPRIMIN QË MBOLLI MUNGESA IME

———————————————–

Fryte të pjekura nga Ti doja

fryte që ëmbëlsojnë stinët e jetës

në çdo kohë

Mezi prisja mesëvjeshtat

të të shihja e të merrja në duar

të strehoja e të mbaja në gji

tash kur shirat pa prajshëm

rigojnë monotoni

e dimri tej porte

borëton vetmi

Gjatë prita

ditëzezave që s’u bënë të bardha

netëfshehurave që s’u duken kund

Kur pritjes i iku ora

drejt Teje eca ashtu si isha

herë i kthjellur herë i përhënur

Të pikëpjekesha me ty

aty ku ishe si përherë

trupdrejtë me degët e varura nga frytet

deri në tokë

doja

Rreth e rrotull shtatit tënd

ferra shkurre e barishta të egra

shtat kishin lëshuar

Dhe brejtës të ndryshëm

nga rrënjët e deri në majë

t’ishin lëbyrë

Nuk e njihja më tënden fytyrë

Dora ime që t’përkëdhelte e të shprushte

për çdo pranverë

të ka munguar

Nuk është faji yt

Atë pemën që e kisha lënë

koha e paska qukit

e zhbiruar deri në palcë

As grerëzit nuk e paskan kursyer

natën duke fjetur hojeve të thurura

në brendësi

e ditën nëpër fryte

Në vend të asaj që desha

dëshprimin që mbolli mungesa ime

shijova

Vetëm një gërdhajë

rreth së cilës lëpihej era

e mora

( 25 tetor – 22 nëntor 2022 )

/www.qendrapress.com/

—