Fryma poetike  e së mërkurës me poeten:- Ervina TOPTANI

Àt,

——————-

Ne i shkulëm nga rrënjët të gjitha,

çdo gur e mur kthyem përmbys,

Në gjunjë përpara teje veç nënat,

Asnjë burrë, për bè asnjë burrë

Àt,

Ne i braktisëm ata që deshëm më shumë,

Pastaj mëshirë prej Djallit kërkuam,

Në gjunjë përpara teje veç nënat, Àt,

Asnjë burrë për bè nuk u pa kurrkund

Àt,

Na mblodhën në tufë e mbi kokat tona të qethura lëvizte lidhur në lavjerrëz një Dritë,

E ndoqëm Àt, menduam se ishte Shpresa

e zbritur për ne, nga Ty

Turma u bë popull Àt, u bëmë shumë,

E Shpresën donim të preknim të gjithë,

Mbi kokat e shoshoqit shkelëm me dhunë,

E gjakun e njëri tjetrit lëpimë

Àt,

Në gjunjë veç nënat para Teje,

Në kraharor djemtë e pajetë shtrëngojnë,

Kënetave të lotëve ku mbytëm Shpresën,

Më kot Dritën e saj kërkojmë

/www.qendrapress.com/