Çaste poetike me poeten;Anila TOTO

Qyteti im nuk ndryshon…

—————————————

Qyteti im nuk ndryshon dot.

Rrugëve mund tu ndryshojmë emrat, por jo gjurmët,

Fasadat ngjyrat, por jo dinjitetin dhe të vërtetat.

Mund të ndryshojnë meloditë, ritmet, por jo këngët

Njerëzit zgjidhjet, por jo vlerat.

Nëse pyet për Vlorën të njëjtat do të thonë.

Dinë Rrugën e Pavarësisë, ‘’Muradien’’ dhe’’ Kuzum Babanë.’’

Pastaj këngët me portokaj e limonë

Dhe historitë që toka mban.

Pastaj do flasin për tokën, anijet dhe detin Jon

Për plakat shamizeza, të rënët dhe lirinë.

Nuk kanë ç’të thonë tjetër, qyteti nuk ndryshon,

Edhe pse e ndryshojmë përditë.

Në këtë qytet ende numërohen fara e fiset

Ende zbatohen ritet dhe traditat e lashta.

Ende numërojmë kohët, vlerat dhe dhimbjet

Fitoret dhe humbjet, perëndimet e arta.

Ende shkohet në varreza kokëmbuluar çdo të diele

Mbajmë në trup thellësinë dhe kripën e detit.

Ende e fitojmë me mund gjithçka në jetë,

E mbetemi të lashtë si qyteti…

/www.QendraPress.com