Fryma poetike e së mërkurës me poetin;Gëzim AJGERAJ

QE NJËZET VJET

—————————–

Kam njëzet vjet

që këtë bishë të zezë

të veriut

kam hedhur

përtej gardhit

Në fakt

ka ikur dhunshëm

qysh atëherë kur mbillte krimin

kullave të shkrumbuara dardane

e hapte varre oborreve të mia

Me vete

e mori krimin

e me të

e ngriti perandorinë

atje në Kalamegdan

Ka njëzet vjet

që mburret me lëvdatat e krimit

prej monstrumi apokaliptik

që mbolli Ballkanit

Ka njëzet vjet

nga përtej gardhi

më ndjell vdekjen përditë

e herë-herë

më fryn me kobin e mortit

Qe njëzet vjet

s`m’i ndahet se s`m’i ndahet

diellit tim të zbehtë

që mezi ia pashë sytë

krejt në fund

të shekullit njëzet

Qe njëzet vjet

kjo bishë nga Kalamegdani

çdo ditë më ndjell kob

e ma këndon këngën e mortit

Medet në ç`hall

është drita e diellit tim të zbehtë

/www.QendraPress.com/