Fryma poetike e së dielës me poetin;Sabit RRUSTEMI
TË KAM VETËM TY, IMI ATDHE
( Varianti final )
—————————-
Në secilën pore të trupit Tënd
një gjurmë kam lënë
Diku hapin tim të vogël
gjurin e vrarë
bërrylat e gërvishtur
diku hundë e buzë troshitur
dhe në mend s’më ka shkuar të t’fyej
a për t’u hidhëruar
Jam ngritur e kam ecur
duke mbjellur pemë rreth shpie
Kam lëruar dhe arat
moteve pa fund
besa dhe lule kam mbjellur
e ëndrra sa një mal
Më t’bukurën ëndërr kam ëndërruar
nën hijen e vetullës së Saj
dhe mendjesh s’kam fluturuar
Hapësirave Tua jam katrithur
sa përpjetëza e tatëpjetëza kam ngrënë
nuk mund t’i numëroj
Dhe kur jam mbushur vrerë
jam ndëshkuar
as kur më kanë dëbuar
nuk jam zbrapsur
Shpresash nuk jam thyer as edhe njëherë
drejt gjirit tënd kam vrapuar
Si i eturi për ujë te Ti jam kthyer
nën hije therrash jam strukur
kulla të reja duke projektuar
e rrugë
e krejt ç’më është dashur
se si do t’më vinte
ajo e ëndërrta
ajo e shndërritshmja ime me shekuj vonuar
Dhe qiejt kam trazuar prej gëzimit
duke fshirrë rrëketë e thella të gjakut
të pikëllimit
për ta shijuar një buzëqeshje të çiltër
agujve të lirisë
duke i shtrirë krahët horizontit
për t’i haupur dritaret e dashurisë
… se nën dhe e mbi dhe
të kam vetëm ty
imi atdhe…
/www.QendraPress.com/
Fryma poetike e së dielës me poetin;Selim TAHIRI
Të djegur
————————-
Me mallin që më digjte, u nisa drejt teje
Rruga më dukej e gjatë, e pafund,
Sa më shumë që t’afrohesha,
zemra më rrihte më fort,
këmbët më dridheshin më shumë.
Prisja t’i gjeja gjërat siç i kishim lënë:
bukën në sofër, të paprekur
gotat e mbushura me ujë të freskët
librat mbi tavolinë
zogjtë duke kënduar mbi degë t’qershisë
rrobat duke u tharë në ballkon,
trëndafilat e bukur në oborr, plot aromë
Por më hutoi, më tronditi pamja që pashë.
Thashë: mos vallë kam humbur rrugën?
Apo çmendur jam?
Pastaj pashë diçka që ma tërhoqi vëmendjen:
një fotografi e shkelur, fshehur në bar, një kujtim i largët
E mora, e shikova,
nuk di nëse kam qeshur apo qarë.
Ashtu, i mpirë para teje rashë në gjunjë,
mbeta gjatë duke të t’shikuar ty.
Unë, djegur nga malli,
ti, shkrumb e hi.
/www.QendraPress.com/
