Çaste poetike me poeten:Ermira BEZATI

Me zë nëne

———————————–

Ç’gëzim i ëmbël më erdhi atë ditë gushti

Kur përmes dhimbjesh bij më erdhe ti

Më dehe shpirtin si të ishe lëng rrushi

M’i dhe më shumë kuptim fjalës dashuri.

Mes lotësh gëzimi dhimbjen më s’e ndjeva

Kur të mora në krah çdo gjë u harrua

Të putha ëmbël dhe të përkëdhela

Të pëshpërita me zë nëne zemër sa të dua.

U linda vajzë, bekuar me një vajzë

Me një rreze dielli me një mrekulli

U ndjeva e lumtur si të isha në parajsë

Me ty bukuroshja e mamit e vogla ime ti.

M’u bëre si motër o shpirti mamit

Më je bërë ti mikja ime më e mirë

Princeshë e çmuar për zemrën e babit

Gjerdan i floririt me gurë xhevahir.

U rrite moj lule më je bërë si një yll

Me linja të bukura me hijeshi të rrallë

Je ëndrra më e bukur kur sytë i mbyll

Kur ti të shkosh nuse malli do më marrë.

/www.QendraPress.com/