E mërkura poetike me poetin;Gëzim AJGERAJ

Pipat e pemës së degdisur

—————————-

Piptojnë

sythet e stinëve

të mërguara

larg trungut të harruar

rriten me motet

larg

me stinët e huaja

përmbi

në mes të harrimit

lëshojnë frytin

mes udhëve

pa e ditur

motin e të nesërmeve

2.

Në stinë udhësh

e gjetën veten

mes ikjesh

pa e ditur

se nga vinin

e ku po shkonin

stinët ishin përzier

furtunave

nëpër motet

ballkanike

vetëm ikja

pajë

u kish mbetur

3.

degët e moçme

një nga një

po i gërryen koha

lidhja me trungun

shkëputet përditë

stinët

tmerrshëm

i fryjnë harrimit

4.

Ku t’i lëshojnë

këmbët e së ardhmes

dhe rritën

stinët e huaja

të udhëve

janë bërë një

me ato të kthimeve

mbetën

sythe pa trung

nëpër degët e degdisura

2021

/www.QendraPress.com/