Çaste poetike me poeten;Donika Stasa DOMI

E VETMJA PERËNDI !

(Nënave )

——————————-

Ajo…

nuk ish modele pasarelash ,

as ikonë arti

që pushtonte ekranet ,

por mirësi e paskajë

i mbushte sytë me dritë ;

mbi ballin e dritëruar

e paqtë ulej hëna ,

e bukurinë të pamatshme

e kishte në shpirt …

E papërtuar…

duarartë ishte Nëna ime ,

mëndafsh dashurie

thurte n’dritë të kandilit ,

dimrave i peshonte nata

mbi supet e lodhur ,

po sërish ditën niste

me yllin e agimit .

Nuk i lakohej emri…

pritjeve zyrtare

a darkave mondane ,

ishte thjeshtësi e bukur

der në madhështi ,

peshë i kish fjala

e kudo lëshonte rrënjë ,

dhe mbeti kaq hyjnore…

si të ish’ mbi tokë

e vetmja perëndi

/www.QendraPress.com/