Fryma poetike e së dielës me poetin:Gëzim AJGERAJ

PËR MUNGESËN E FJALËS

——————————-

Kambanë i bie fjalës, kambanë mendimit

Rreth e rrotull zukamë rreth mortit të dritës

Grevës së saj e bukura kund s’pikoi

As për farë e as për të bukurën e vargut

Diku mes kaos mesit luan lojën fshehtas

Për pikë të qejfit e për hatër të vargut

Më ka zënë ky mall ta shijoj ajkën e saj

Më kot, s’e gjej as në bollëkun e fjalëve

E as në shtarën e lëndinave të thata të fjalëve

Më kot i kërkoj freskinë frymëzimit

E etjes për fjalën e bukur i bëj sehir mes kësaj amullie

Thonë se ia kanë vrarë filozofinë e mendimit

Psikologjia kish mbetur shkencë e panjohur

Metaforat ishin shndërruar në thnegla të papërdorshme

Se dëshira për hermetizmin moti kishte vdekur

Kërkesës për ecje lart e më lartë të vargut

As nam e nishan s’i dukej kërkesave të fjalës

Kot i kërkova etjes nëpër këtë përsiatje fjalësh

Kur mendimi e leximi kanë hyrë në grevë

Diku në ballkonin e Alpeve të mbytur amullisë

2023, Zvicër

/www.QendraPress.com/