Çaste poetike me poeten;-Shqipe BYTYQI

SHTATË

———————————-

Ata s’donin t’rrisja gra

ata donin vetëm Afërdita

unë doja një Emmeline Pankhurst

që thotë, ne nuk duam të thyejmë ligje

ne duam ti bëjmë ligjet

(të shkruarat dhe të pashkruarat)

shtatë herë dështova frytin

shtatë herë i shpalla luftë Aristotelit

shtatë është numri im

shtatë herë i dhash zërit

shtatë herë kordat grykës osciluan

ky numër m’ka ndjekë tërë jetën

shtatë palë bjeshkët e legjendës

shtatë motrat në shtatë krojet

shtatë shpirtra mbaj n’vete

shtatë gjuhë të shkurtuara

shtatë herë morri n’shenjë Artemida

dhe mallkimin e sojit nuk e vrau

po aq herë më bekoj Hera

kur më nisen nuse si gruan e shtatë

edhe kur më vodhi Hadi

kur më hodhi këmishën prej errësire

kur më mbylli në të shtatën nëntokë

dhe gojën me shtatë drynj

U nisa t‘padis Aristotelin

them, jam plotni njerëzore,

domosdoshmëri jete

gjersa gris çdo gjë, që m’zë frymën

që m’lejon veç një gjysmë volumi mushkërie

një frekuencë të caktuar zëri, një ton

prandaj edhe m’tundnin para sysh

histerinë

Unë tashmë jam nisur

jam nisur

rrugës kudo shoh

një Emmeline Pankhurst

/QendraPress/