Çaste poetike me poetin;-Rexhep F.MORINA

NËPËR DEKADA KALOVA

——————————————-

Jam bir i popullit tim,të lashtë sa kjo tokë,

Në fëmijëri nëna më këndonte me zë e lot.

E babai tregonte për gjyshin histori e fjalë,

Si luftoi kundër egërsirave, dimrit në mal.

Shtatin kam hedhur, lis me rrënjë të thella,

Me vëllezër e motra, jo si bisha në shpella.

Jam rritur me këngët kreshnike të lahutës,

Me traditën e guximit, që i thotë ikë tutës.

Përtej territ më falej drita e bardhë si plisi,

Ta njoh trungun tonë, e ku i ka rrënjët fisi.

Të jemi pranë në stuhi, përkrah njëri tjetrit,

Ishte zakon i bartur brezave, nga të vjetrit.

Kjo frymë bujare, më jepte forcë e kurajë,

Në furtunat e kohës, për rreze kish uzdajë.

Më mbajti të patundur fort, rrap shekullor,

Nëpër dekada kalova, sikur tanët arbëror.

/QendraPress/