Çaste poetike me poeten;-Blertë Tmava VESELAJ

Fotografia e fëmijërisë

———————————

Foton e vjetër e mbaj në duar,

Pas shumë kohësh e gjeta rastësisht.

Sikur ishte fshehur nga unë gjithë këtë kohë,

Për ta gjetur sot që të lundrojë në fëmijëri.

Atje ku gjithçka ishte e veçantë

Ku gabimet fshiheshin me një më fal

Ku balta shijonte si ëmbëlsi,

E duart i ngrohnim pranë zjarrit në shtëpi.

Atje ku koha s’kishte ngut,

Dhe ditët vinin me aromë buke,

Ku zemra qeshte pa e ditur pse,

E dhimbjet shuheshin në një përqafim pa lutje.

Tani e shikoj dhe ndalem në kujtime

Fëmija aty më ngjan kaq i largët,

Por diku thellë ajo ende jeton,

Në çdo kujtim që heshtur më thërret sonte.

/QendraPress/