Çaste poetike me poetin;-Faruk TASHOLLI

KËNGA IME PËR RAMADAN MUSLIUN

——————————————————

As gjethin e fundit në vjeshtë nuk e prite

Ta shohësh të tharë si dredhet në erë,

I këputur nga rrembi ndër përthyerje drite

Kur në sfond zbrazëtia pikon vetëm vrerë!

I mbyllur në vete në kuvlinë me letra

Ç’i shprushe shpirtërat mbuluar pikëllim,

Nuk prita të biesh si degët e vjetra

Dan, o Dan Musliu, Dan o miku im!

Në vitin e vdekjeve kur ra në gjunj bota

Si gur heshtja jote më zu të trishtuar,

Mbi tryezë të vjetër të pret me mall gota

Dan, o miku im, kalorës i nxituar!

Ti mungon e vjen si stina e bukur      

O urtak i qetë shprish grumbujt e dhembjes,

Tek rrënjët e fjalëve mbetesh zog i strukur

Me lëngun e shpirtit mbi regtimën e këngës!

Si të pres tash unë vjeshtës i tretur

Kur gjethet e fundit bien me trishtim,

Për dy fjalë me ty keq mbeta i djegur

Dan, o Dan Musliu, Dan o miku im!

(tetor 2020)

/QendraPress/