Fryma poetike e së dielës me poeten;-Shkurtë Kadriu ÇITAKU

Sexhadja

————————

Të falem, o Zot,

Për ngjyrat e shpirtit

Që kanë marrë nuanca të zbehura,

Kur dëgjoj zëra të çjerrë,

Llum me fjalë boshe,

Dhe shoh buzëqeshje aq cinike

Në tokën e askujt.

Të falem, o Zot,

Se jam pak e vagullt në mendje,

Për luftërat e njeriut

Që padrejtësisht

Vrasin njeriun

Dhe shkelin me majë e thembra në shpirt.

Të falem, o Zot,

Se nuk e di nga t’ia nis,

Tek shoh udhët që bien teposhtë,

Me to dhe unë, në këto humnera të buta

Që tinëzisht ftohin shpirtin.

Të falem, o Zot,

Teksa heqim shallin rreth qafe,

Duke ndjerë një liri,

Atë që nuk mund ta shohim të gjithë.

Të falem, o Zot,

Që unazat e kohës

Shtypin rrathët e jetës,

Përderisa, mbështetur në mur,

Shoh sexhaden e nanës

Dhe ndiej se më verdhërohet shpirti.

/QendraPress/