Fryma poetike me poetin:-Luan SHEHI

ATJE TEJ ZOGË E VJESHTUAR

—————————————

Atje tejë zogë e vjeshtuar,

pyjesh heshtur…s’di përse,

ndoshta malli e ka kapluar,

mekur gjethesh aty me nge…

Gjethesh mekur diç kërkon,

pendë-lëshuar nën kujtime,

brengën humbur s’e harron,

kthyer pas ndër shtegëtime…

Eh, më kot shtërngatat pret,

mes stuhishë të ngrihet-ulet,

si murgeshë hiç më nuk flet,

peng vetmie…sërisht ngulet…

Atje tejë zogë e vjeshtuar,

terur brengash…s’pipëtinë,

ndoshta malli e ka kapluar,

gur kujtimi bart mbi shpinë…

/QendraPress/