Çaste poetike me poeten;-Fatbardha Xhani MYSLIMAJ

FRIKËRA DASHURIE

—————————–

Ti nuk e di pse unë hesht gjatë

Sa herë nga larg më ngre dorën e më flet

Malli yt, si thëngjijtë ndizen, sa herë fryn era

Fshin hirin e ngeljehatrit a të pendesës…

Kujtimesh flakëron qielli i nëntorit mbi re

Sikur don të kujtojë dashurinë e heshtur

Atë të bukurën që zien valë në akullin

E një stine të ftohtë, që avullon e djeg…

Ti nuk do ta dish pra, pse përgjigje s’merr!

Rri e sodis me duar vizat e qiellit rozë

Si rrudhat mbi buzët e mia, i fsheh buzëqeshja

Ndaj qesh shpesh, mbuloj moshën me gaz…

Pastaj fsheh duart me njolla në xhepat e mi

Qafën mbuloj me shall tê kaltër mëndafshi

E rrobat e lirshme maskojnë tepritë në bel…

Unë hesht, bëj siç bën vjeshta vit për vit:

Zverdhem e skuqem, piqem e zbutem

Joshjen sajoj me ditët e harruara tê moshës…

Edhe pse në secilën ditë që kalon heshtazi

Lexoj një thinjë të bardhë mbi tëmtha

Dhe thërras me kaq mall dashurinë

Të vijë e të më komfirmojë bukurinë

Me një pëshpërimë gjethesh që bien…

/QendraPress/