Çaste poetike me poeten:-Vjollca ALIAJ

Vogëlushi me sy të gjelbër

————————————–

Ndjek derën e autobusit, lëviz ngadalë.

Aty kultura shtyhet me bërryla si njerëzit.

Një vend për t’u ulur klithet fitore:

“Eureka!”, “Eureka!” më në fund…

Nga dritarja e hapur brymë yjesh kapërdihen,

si drapër argjendi, hëna e fillimshkurtit.

Një zë fëmije, në sfond të ajrit, i huaj:

— Pesëqind lekë, pesëqind lekë më jep… Të lutem!

Oh, vogëlush me sy të gjelbër!

Vështrimi lart, sikur parajsën kërkon.

Dritë e tyre, një ylber i çuditshëm;

e nderur dora si heje akulli shpon.

— E paska rritur kërkesën! — pëshpërisin.

— Nuk lyp për bukë. E shfrytëzojnë — shton dikush.

Por buzkat e vogla, plasaritur nga ftohma:

Faleminderit! — thonë. Faleminderit shumë!

Ndalesa e radhës, një zë çirret:

— Jashtë! Zbrit, më mos të të shoh!

Në vend të përgjigjes, vetëm pika loti;

qielli i mbrëmjes kryeqytetin përgjon.

/QendraPress/