Fryma poetike e së mërkurës me poeten;-Ymrije BEQIRI

KUR ERDHA NË JETË

—————————

Nuk e di si erdha,

nuk më kujtohet ajo natë…

Toka pati dhimbje

bashkë me nënën time.

Dhimbjet e nënës sime

atë natë i përjetoi edhe toka.

Në natën e errët unë kisha uri,

nëna më vdiq nga etja.

Mua nuk pati kush të më vë në gji,

nëna dhimbjet nuk mundi t’i durojë.

Ishte dhimbje e madhe,

sa e tokës,

sa dhimbjet që m’i solli mua.

Ah, sa i pafat isha,

pse, nënë, ike pa mua?

Pse më solle e më le në këtë jetë,

ku njerëzit s’kanë mëshirë

as për tokën e vet,

e çka të bëj unë, fatëziu?

Dëgjoj rrahjet e zemrës sime,

pse, nënë, s’more pak nga unë

që të jetoje ti?

Do të ndryshonte

edhe pema e jetës sime!

/QendraPress/