Çaste poetike me poeten:- Margarita Llapushi ZENELI

Nuk kam kohë të urrej

———————————–

Nuk kam kohë të urrej,

se dashuria ma merr kohën

si buka duart,

si uji etjen

pa zhurmë, pa justifikime.

Mirësia më vonon çdo ditë,

më ndal te njerëzit e bukur,

ata që flasin pak

dhe bëjnë shumë,

dhe urrejtja mbetet pas

si rrugë e pashkelur.

Ata që hedhin hije

nuk e dinë

sa peshë ka dielli

kur e mbart vetëm.

Koha ime është për dritën

që nuk të verbëron,

për zemrat që rrinë hapur

edhe kur lodhen.

Nuk kam kohë të urrej

jeta më kërkon të gjallë.

/QendraPress/