Fryma poetike e së dielës me poeten;-Greta Kadare TETA
Netë me Gravitet të Butë
——————————-
Ka disa net
i dua fort.
S’ndodh të kem pirë —
dehem me lot.
Vetmia, pikërisht atëherë, fillon të këndojë,
pastaj më kërcen mbi kraharor.
Unë nis e qesh —
nuk kam më formë.
Dallohen vetëm gjijtë e përkorë.
Trupi im bëhet shtjellë.
Mbi mua zbret një shpirt tjetër.
Këndon.
Kërcen mes përmes të qeshurës.
Prek të gjitha orenditë
që heshtin qark meje.
Të vetmet të ndjeshme janë kaçurrelat —
ato, absurdi i përkëdhel me duar.
Unë, për dreq, jam e gëzuar në këto net.
Një shpirt tjetër më kopsitet në venë
e rrjedh mungesë.
Nuk e pyes.
Këndon.
Kërcen mbi kraharorin tim.
Unë vetëm qesh.
/QendraPress/
