Fryma poetike e së mërkurës me poeten;- Margarita Llapushi ZENELI 

Gruaja që bëhet stinë

———————————-

Mos u dashuro pas një gruaje

që zgjohet me diellin në sy

dhe fle me hënën në kraharor.

Mos u dashuro pas një gruaje

që e njeh vetminë si mike të vjetër

dhe nuk trembet nga heshtja,

sepse në heshtje ajo lind botë.

Mos u dashuro pas një gruaje

që lexon yjet si libra të vjetër

dhe gjen në to emrin tënd

të shkruar me zjarr.

Mos u dashuro pas një gruaje

që qesh si pranverë e qan si vjeshtë,

që puth si flakë

dhe hesht si akullnajë.

Mos u dashuro pas një gruaje

që rri përballë një tabloje

derisa ngjyrat t’i hyjnë nën lëkurë,

që s’mund të marrë frymë pa muzikë,

sepse notat i rrjedhin nëpër vena si gjak i dytë.

Mos u dashuro pas një gruaje

rebele si dallgë,

e kthjellët si agim,

e hareshme si verë e papritur,

e rrezikshme si e vërteta.

Mos u dashuro pas një gruaje

që e kthen dhimbjen në art,

që i mbjell plagët si lule të egra

dhe i ujit me këngë.

Sepse nëse dashurohesh me një të tillë,

ajo nuk do të jetë thjesht grua,

ajo do të bëhet stinë.

Dhe stinët nuk i harron.

Ato kthehen.

Edhe kur largohen,

lënë erën e tyre në lëkurën tënde.

Dhe ti,

edhe nëse shpëton,

edhe nëse ikën,

një grua e tillë

nuk është dashuri që kalon,

është zjarr që të mëson si të digjesh

pa u shuar kurrë.

/QendraPress/