Çaste poetike me poetin;-Luan MEMA

Korridoret e padukshme

———————————————-

Poemat e mia të djeshme

vërtiten në dhomë

në kufirin e padukshëm të dashurisë

Kufiri merr frymë

dhe largohet prej meje

duke u ngjitur në mur

Muret janë mendime të ngurta

që ëndërrojnë korridore

Poezitë ngjiten në ajër

si hije të lehta

Nga poema e qiellit janë larguar yjet

hapësira hapet brenda nesh

universi merr frymë në heshtje

Hap gojën, e dashur

dhe lind një diell

si klithmë kundër hënës

Poema e dashurisë bëhet dritë

që ndriçon brenda vetes

zemrat në ajrin e qiellit

Trishtimi i mbrëmjes tretet

në një dritë pa burim

Dhe kur drita kthehet në dhomë

poemat e mia të djeshme

vërtiten sërish në kufirin e padukshëm

/QendraPress/