Fryma poetike e së dielës me poeten;-Luljeta F. LUBOVCI

ARTIN E BESNIKËRISË

——————————

Artin e besnikërisë e mësova nga dryni,

u thye nga stuhitë, por jo nga tradhtia.

Mbi plagët e hekurta mbajti heshtjen,

si zemra që ruan të shenjtën dashuri.

Çelësi i tij mbeti po ai,

nuk ndryshoi rrugë, as emër, as fjalë.

Edhe kur koha e sprovoi rëndë,

besën e mbajti si gur në ballë.

Kam parë njerëz që ndërrojnë ngjyra,

si gjethet që era i shpërndan larg.

Por besnikëria s’është petk për stinë,

është rrënjë që s’e shkul asnjë dallgë.

Prandaj nga dryni mora mësim,

se vlera nuk matet me forcë a pushtet.

Mund të thyhesh nga jeta një mijë herë,

por kurrë të mos ndryshosh shpirtin e vërtetë.

Se besa nuk blihet e nuk shitet,

ajo jeton në zemrën që rri drejt.

Si çelësi që gjen të njëjtën derë,

edhe besniku mbetet besnik përjetë.

/QendraPress/