Çaste poetike me poetin;-Çerkin BYTYÇI

FANAR NËN PJEGULL

——————————–

Pjegullla plotë rrush

më dhuron përshëndetjen

e gjelbërt në shpirt

posa ulem nën te me mallin e tretur

në vreshtën e dikurshme.

Nga shetia e mendjes

në këtë pushim nën pjegull

mbetet një jehonë e lehtë:

të qeshurat e mllefit tim

pezmi i zërit

që ende del kumbues

dhe disa pika loti mbi letër.

Ndoshta këto, pa dashje,

lënë gjurmë

si një fanar

në kujtesën e atyre që vazhdojnë

t‘shijojnë hijen e pjegullës.

Tek vonë e vërej se në tavolinë

kafeja priste të zgjohej harresa ime.

KOHË E HUTUAR

Nuk e di pse

shpresa e mllefosur

shpesh arratiset

dhe ngarendë e s‘lodhet

pa hartë e busollë

në kërkim të shtigjeve

të reja…

Edhe në erë

e në motin me rrebesh

në vapën përcëlluese

e në t’ujvarës rrjedhë

nuk gjen as strehë

as adresë.

E shpresa vazhdon

e hutuar s‘ndalet

rrugëtimit të pafund;

në pritje mbetemi vetëm ne

n’deshifrim

të mbarimit te fillimit.

E n’shtegun e vetëm

hapi i shpresës,

(ah hapi i shpresës!)

ende n‘vendnumrimin e lodhur

bashkë me shpresimtarët

dhe me kohën e hutuar.

/QendraPress/