Çaste poetike me penën brilante te ;Gëzim AJGERAJ

KTHIMET PO VONOJNË

——————————————

Tej përtej harrimi na i ra vonimit

motet që mërguan e më s’ u kthyen

për një këmbë mbathcash nuk erdhi kthimi

mbeti hije malli udhë e mallkimit

mbeti ikje udhë ëndërr e mashtruar

kujtim asaj dite kur e morën ikjet

në mos lamtumirë o Zot i bekuar

dekadat që shkuan e s’erdhën kthimet

mbeti pritja dhimbje lotë atje tek strehët

ëndrrat që u ndryshkën tek portë e avllisë

u shkretuan këngët kush as zë s’ u nxjerrë

ç’ shëmti e trishtë i zu frymë shtëpisë

mallin përtej largë e zuri harrimi

udhët ikjet ëndrrat kthimet që nuk erdhën

mespërmet ëndrrat i zuri mallkimi

votërshkretat presin kthimet s’dinë ku mbetën

2021, Malësi e Vërrinit