Çaste poetike  me poeten:-Donika Stasa DOMI

VEÇ AROMËN TËNDE

——————————-

Një re të hirtë ,

si shtëllungë puplore ,

preka butësisht

në faqen e qiellit ,

e me mollëzat e qullëta

të gishtave të dëshirës

i dhashë formë ,

sikur të ishte një pulëbardhë .

Në këmbën e vockël ,

me kordele malli

i lidha një luledele ,

atë që mbi krye

i gjej rubinë vese ,

që mungesa ka hedhur

mbi petalet e bardhë .

Nuk e di , o Nënë ,

nëse atje lart , mbi re ,

engjëjt

kanë lule e zogj në kopshte ,

por në shpirtin tim

luledelet

asnjëherë nuk janë tharë .

Ndonëse mbi lëndinë

kanë rënë e ikur dimra ,

sërish kanë trokitur pranverat

e kanë dielluar

të tjerë beharë .

E sot

të përgjërohem, erëmira ime :

më largo këtë mall

që çdo qelizë ka pushtuar

dhe , prej mbretëri qiejsh

ca buzëqeshje hyjnore

më nis e mira Nënë ;

mbi shpinë të ndonjë rrezeje ,

a mbi varkën e një hëne ,

të më ngrohin shpirtin

si i yti përqafim ,

e të gjitha ndjesitë

të më sjellin

veç aromën tënde .

D Stasa

/QendraPress/