Çaste poetike me poeten:-Fatbardha Xhani MYSLIMAJ

NJË TJETËR GRUA

————————–

E dini,

Shpesh nën zë

Them se kam lindur

Për të qenë një tjetër grua

Komplet tjetër nga kjo që jam!

Mbushur plot

Me guximin e krisur

Bërtas të vërtetat pa frikë

Nisem nëpër udhëtime e vetme

Takoj njerëz të çuditshëm nëpër rrugë!

E lirë dhe flu

Shëtis si polen nëpër ajër

E gjithë dëshira e pjalmimit tim

Pëllcet prej zemrave të verdha lulore

Pa frikën e keqkuptimit, them fjalën time!

Lëkundem lehtë

Nën puhinë e erërave

Padashur rrëzohem përtokë

Nuk vritem e ngrihem sërish e sërish

Prej prushit nxjerr flakën e dëshirës zjarr!

Ndris netëve

Në dritën e xixëllonjës djeg

Gjithë çastet që i lashë të kalonin

Pastaj përvëloj veten pa menduar

Në mendjelehtësinë e dëshirave flakë!

Shpesh e shoh

Diku ku askush s’e di

Dikë që e njoh shumë mirë

Atë grua me sytë si vetëtimë

Që thotë me zë të prerë: e dua dhe pikë!

/QendraPress/