Çaste poetike me poeten;-Leonora N. LOKAJ
E shkuara është stuhi
———————————
Mbi kujtimet brinjëdala mos u preh
këngëtojnë
mallohen
tunden
si stuhitë mbi Kepin e Shpresës së Mirë
Mos e kthe kokën pas
afshi i fashitur përplas krahët
si shpend i zënë mes muresh të ftohta…
E shkuara është stuhi
Mos lejo mbrëmjet e mallëngjimit
të mbajnë pezull mbi yje
s’ka ditë
natë
lindje
as vdekje
që kafshon tashmen tënde
Lavdi
luftës
armiqve
humbjeve
dhimbjeve që kullojnë
puthjeve të vala
dhe përqafimeve me ujqër
që lënë nishana n’shpirt
Prishtinë
Fundverë, 2025
/QendraPress/
