Çaste poetike me poeten:-Luljeta F. LUBOVCI

Në Prekaz ndizet 28 Nëntori

—————————————–

Në kullen tënde, Komandant, natën e rrethuan,

po ti s’u dorëzove—u bëre flamur në gjak.

Era e Kosovës qau mbi pragje që digjeshin,

por kënga e pushkës sate u ngrit si shqipe në mal.

Nëna mbajti djemtë pranë zemrës,

siç mban dielli agun para se të shpërthejë.

E Prekazi u bë lis i lashtë

që nuk e shemb plumbi, as flaka, as koha.

Sot, në 28 Nëntor, kur flamuri na peshon mbi shpinë

si amaneti yt i përjetshëm,

ne të kujtojmë jo me lot, por me ndritje fytyre—

se liria që na vjen prej teje ka aromë gjaku e krenarie.

O Adem, bir i tokës që s’u lodh kurrë së rrituri trima,

emri yt sot është dritë që nuk shuhet,

këngë që nuk hesht,

betim që nuk thyhet.

E sa herë shpaloset flamuri kuq e zi,

ti ngrihesh me të, Komandant—

i gjallë në çdo zemër shqiptari.

/QendraPress/