Çaste poetike me poeten;-Sadbere Gagica SPAHIJA

Faqja e Katërt e Ditarit – “Betimi im”

———————————————————-

Sot, para shpirtit tim dhe gjithë asaj që kam përballuar,

bëj këtë betim:

Nuk do të përkulem më për t’u pranuar.

Nuk do t’i përgjigjem më ftohtësisë me lutje.

Nuk do ta ul më zërin që zemra ime të

mos duket shumë e gjallë.

Unë jam grua që kam dalë nga hiri i vetes

jam rrëzuar pa dëshmitarë dhe jam

ngritur pa duart e askujt.

Kam mbledhur veten nga pluhuri i përbuzjeve

dhe kam endur shpirtin tim në heshtje.

Nuk dua të jem e përsosur —

 dua të jem e vërtetë.

Të qesh kur dua, të qaj pa turp,

të hesht kur fjalët s’ia vlejnë.

Le të më keqkuptojnë, le të flasin,

se unë e di kush jam:

jam ajo që di të qëndroj edhe kur dhemb,

ajo që zgjedh paqen edhe kur heshtja

 dhemb më shumë se britma.

Nga sot,

nuk kërkoj më aprovimin e askujt.

Do të mbjell qetësi në mendjen time,

do të ruaj dinjitetin tim si kopsht

që s’e shkel askush pa leje.

Dhe kur të më kapë mërzia,

do t’i them vetes:

“Ti nuk u shkatërrove.

Ti u rrite.

Ti u ktheve në dritë.”

/QendraPress/