Çaste poetike me poeten;-Shqipe BYTYQI

TIK TAK

(këmbanë)

——————

Heshte

edhe kur të vodhën

shpirt, nder, besim…

Lotove

e sërish

çelësat ua dhe

Jam lutur

për dije vocrrakësh

për ofshama t’sëmurësh

për gjyqe t’pashitur

Kam qarë

për fëmiun e trëndafilave

për kamarierin pa orar

për shitësen e kushtėzuar

për diplomën e vjetëruar

për mjekët që ikën

për pleqtë me qindarka gishtave

për lotin e fshehur para fëmijëve

Kam vajtuar

kur malet u nxorën n’ankand

kur liqenjtë desh u shitën

kur vlerat u copëtuan

E ti

ende sehir

ende llogari

ende koeficientë

Mos thuaj princip

Mos thuaj dinjitet

është bllokadë

botë që lëngon

është kal Troje

që brenda vrapon

Tik Tak

mbaj vesh

Tik Tak

vepro

Tik Tak

zhbloko

s’ka mbetur shumë kohë

ShB

/QendraPress/