Çaste poetike  me poeten;-Vjollca ALIAJ

Të zënë në grackë

——————————

Gulçon vrapi i kohës

mes dritash shiu vajton ikjen e stinës,

e lodhur mbrëmja

psherëtin frymën e fundit të vjeshtës.

Tej, Shashica, mbërthyer nga re sup më sup,

e ka të pamundur të ledhatojë

me krye hënën…

Pararoja e dimrit, tashmë,

ka zënë në grackë limanet e gjirit.

Tepër vonë për një shëtitje

por valsi i dallgëve josh si

 për të kujtuar funeralin e yjeve.

Në pritë silueta, kruspull, e peshkatarit

luan me perlat e shkumës.

Rrëkëllej tretjen e ditëve

me një penel ngjyer në muzg,

dehem…

udha e vargut sapo ka shtruar

flokët e parë të borës.

/QendraPress/