Çaste poetike  me poeten;- Zamira Hysenaj AGALLIU

Mungesa ime

————————–

Prej mungesës sime zgjuar mos rrini

Unë si Marigoja kam lënë një amanet

Të më hedhin dhè të situr mbi varr

Ata që më deshën vërtetë në jetë!

E nëse mbetësha ndoshta e zbuluar

Nga balta që më hodhët sa isha gjallë

I lani mirë duart tuaja, i lani në krua

Kur të më mbështilleni ashtu vërdallë!

E lot në sy nuk dua t’u shoh aspak

Se shiu në çast do nisë mbi mua të bjerë

Ylberet do më mblidhen kurorë nusërie

E shpirti im do të bëjë dritë mbi mermer!

Me ty që jetës i thashë të dua kaq shumë

Si një kalimtar ti mua , jo, mos më kërko!

Sikur gjithë lavditë t’i derdhësh mbi mua

Ato që s’m’i fale sa isha gjallë, tani s’i dua, jo !

/QendraPress/