Çaste poetike me poeten:Ferdane F. SAHITI

T’du Nanë

————————

Nanë sot mue fort ky fat m’ka randue

S’e di nanë

ndoshta që udhët e dyshimta kurrë si kam rrugëtue

nanë sonte po due me fol me ty

me qa, me dënesë, n’prehnin tand me u shfry

krejt çka kam mrenda me t’i rrëfy

Nanë, e di që shpirtin ta kam randu’

e di që vetëm ti je lutë e ke kajt për mu’.

Nanë, unë keq kurrë s’kam vepru’

por fatin nanë s’po kam fuqi me ndrru’.

Nanë, sonte s’po du me u ndal

derisa hanën kam me mërzitë

derisa dielli të lind e loti me m’ba dritë.

Nanë, kam shumë gurë me i numru

shumë gozhda, shumë therra nanë

që rrugës i gjeta e shpesh herë me to m’kanë gjuejt

e m’kanë lëndu, e m’kanë ba me vuejt.

Nanë krejt vetë i kam largu’

duert gjak m’janë ba

jam vra, po nuk kam ra

por fjalën që ta dhashë nanë

kurrë nga vendi se kam luejt

e mbajta dhe do ta mbaj

edhe nën dhe kam me ruejt,

e atëherë nanë nuk di ma

se çka ka me u ba me mu

a kanë me mi hedh të gjitha

ato therra e gur mbi varr

apo si shkallë për dije kanë me i numëru.

Nuk e di nanë…

ndoshta atëherë s’kam me kujtu asgja

veç nanë, fjalët hala nuk i kam harru

m’pate fol shumë atë natë nanë

si në rrëfime t’luftës i shtrënguam duart

njëra-tjetrës e besë e fjalë i dhamë

ahh moj nanë

gjatë vërshimeve të mëdha nanë

me fjalët e tua jam mbështjellë e jam mbulu’

për atë premtim nanë kurrë nuk jam dorëzu

nanë unë sot deri këtu erdha

unë ju shoh të gjithëve

por ju asnji nuk po më shihni mu.

Nanë,

kam hala me shkru, me të thane, e me t’ tregu

por jam dërmu

po i mbyll syt pak nanë

ndoshta të shoh në andërr ty

se ti m’ke tregu nanë

që çdo natë m’sheh mu.

Natën e mirë nanë

edhe hana nanë tash po më njeh mu.

Nanë po lutem që kurdo që vdes moj nanë

fjala e fundit me kanë: Nanë t’du! /www.QendraPress.com