Çaste poetike me poeten,Hava KURTI KRASNIQI

NË PRITJE TË KTHIMIT

————————————-

Një heshtje e thellë
përtypje kujtimesh
një aeroplan që pret
pasagjerë mërgimesh
disa e fshijnë lotin
për mallin e prindit
disa plasur zemrat
me bagazh zhgënjimesh
sa mot i keq na merr
në pritje të kthimit
&   &   &
PËRGJATË AUTOBANIT

—————————————

Përgjatë autobanit italian
kalojmë shumë ullinj
aq të bukur që janë
sa e shkurtojnë edhe rrugën
Po përse mbjellin kaq shumë ullinj
këta italianët
se u ngjajnë me flokë vashash
apo për shijen e lartë
sido që të jetë
aspak
nuk më vie inat
që ne kemi
ullinjë më pak
jojo
veç habitem
me Italinë
i ngjan çizmes
e ndoshta ullirin
e çan
me takë
por prej
tij nxjerr
një varg vitaminash
të artë
&  &  &

A DONI THANA

—————————–

A doni thana,pjeshka
kikirikë,arra, ujë vesa
a doni mana nga Shala
vajra e krema nga zana
fara të zeza e të bardha
petulla çasti si ke nana
Kështu thërret shitësi
mes çadrave të plazhit
derisa unë i imitoj krijesat
mes detit tim kaltrosh
e në barkën e vjetër
jehon kënga e atit dhe Rexhës
Nën çadrën afër
kris shakaja me hallet e jetës
një i ri mbulohet me rërë
për të mos e parë miqtë që u ka borxh
kamerieri te bregu më sjell një kuqalashe
kështu jetohet vera , shqiptarçe