Çaste poetike me poeten;Neviana SHEHI
DURRËSI
—————–
Është i mrekullueshëm ky qytet
kurdo që ta shikosh
Ndonjëherë më ngjan si i dalë
nga një kapitull i pambaruar përralle
herë të tjerë si prologu
i një poezie dashurish
mjafton të jesh një çast pranë tij
dhe do ta ndjesh brenda vetes
Deti, kodra mbi të
dhe shtëpitë larë me fllade mbrëmjesh
këngët e mëngjesit
dhe sytë e fëmijëve
njëri me i kaltër se tjetri.
Është përtej çdo përfytyrimi
i bukur qyteti që më lindi mua dikur
ndaj sa herë që nisem ta vizatoj
më dridhet dora
mund të jetë fluksi i dritës
që më shpërqendron,
po mund të jetë edhe kënga
antologjike e valëve
Kur bashkohen ato në një pentagram
krijojnë një simfoni dashurie
në mbrëmje ai bëhet edhe më i bukur
drita e hënës
që pikturohet mbi varkat dhe anijet në det
alternohet me dritat e shtëpive dhe rrugëve
janë një ftese për mahnitje
Unë kam qenë dhe do mbetem
një e mahnitur e madhe prej tij
pse jo edhe e dashuruar
kot nuk e kanë quajtur grekët e lashtë
që kalonin me anijet e tyre pranë brigjeve të tij
Ballkon i Adriatikut
dhe nuk e kanë gabuar krahasimin
Në muret e tij gjithmonë
më është dukur se fshihen shumë histori
dhe lavdi të dikurshme
në rrugët e kalldrëmta
ende ndihet troku i kalit të bardhë
të mbretit Monun
dhe Teutës së bukur
asaj Teute
që më ka dhënë dhe mua diçka prej vetes
vetullat, për shembull dhe sytë
Ka ende tinguj shpatash
luftëtarësh dhe gladiatorësh në amfiteatër
sepse ky qytet është ngritur mbi lavditë
është kaq i bukur ky qytet
sa mua më mbeten
të ngrira në gojë krahasimet
/www.QendraPress.com/
