Çaste poetike me poetin;-Abdullah BLAKÇORI

DASHURIA DHE KRENARIA

APO KRENARIA DHE DASHURIA

—————————————

Dy dashuri të mëdha

Mes vete bëjnë gara

Që të dyja militojnë

Cila të jetë e para

Po fitoi dashuria

Që kërkon nënshtrim

Krenaria e prangosur

Shkrihet me nxitim

Krenaria nuk përkulet

Ajo nuk do fron

Nëse nëpërkëmbet

Dashuria s’rron

Dashuria dhe krenaria

Janë dy universe me vlerë

Krenaria po u shua

Dashuria s’ka pranverë

Dashuria dhe krenaria

Dy ndjesi të arta

Ato mund të rrojnë

Veç të barabarta…!

/QendraPress/