Çaste poetike me poetin;-Kastriot MALO

Të kërkoj në Trojë.

——————————

Je zhytur në detin e mjegullt,

Ku të kërkoj qiejve ku se di,

E bardhë qënka kthyer Troja*,

Dhe rruga e ngushtë ku kaloje ti.

Gërvish me thonj shtëllungat,

Të gjej dritaren tënde diku lart,

Nuk e ndjej më aromën e trupit,

As zhurmën e hapave në asfalt.

Eh mike ashtu ishte koha jonë,

Nuk dua të them, e martë lumi,

Nuk dëgjoje as thirrje telefoni,

As kënaqësinë që sjell profumi.

Më tundon kjo heshtje gjatë,

Me veten them vallë kush e di,

Ndoshta diku rri e mbështetur,

Apo mjegullës më kërkon dhe ti.

Por duhet që të zbriste mbrëmja,

Të gatuante ngjyra ky perëndim,

Të dy të kryqezoheshim në rrugë,

Të shkrinim ngricën në veshtrim.

*Troja – nofkë e qytetit Këlcyrë.

/QendraPress/