Çaste poetike me  poetin;-Milazim KRASNIQI

INTERVISTA E PABOTUAR ME LEKA ZOGUN

——————————————————————

Po pinim cigare pa pauzë

unë një, ai tri.

Mezi po e shihnim njëri tjetrin

nga tymi,

në një sallon në Cyrih-Sheraton

ku po bëja një intervistë me të

për mundësitë e kthimit të tij

në fron.

Ndonëse ishte edhe mbreti im

sipas Statutit Themeltar,

ai nuk sillej me mua si mbret,

më ofronte cigare nga pakoja e tij

kur të miat m’u harxhuan

ndërsa, si rregull

mbretërit nuk ofrojnë asgjë.

Për Shqipërinë foli gjatë

po kjo më ngeli më mendje:

munda ta ktheja fronin

pas referendumit,

por vetëm me gjakderdhje

ndonëse fitova vërtet,

nuk desha gjakderdhje

sepse froni është vetëm një kolltuk

nga druri dhe mëndafshi,

nëse bëhet eshtrat

dhe nga lëkurat e njerëzve

ai nuk është fron

është ferr.

Në ato çaste Leka ishte vërtet mbret,

ndonëse pa fron e pa atdhe,

por me dinjitet.

Shqipëria nuk e pati fat,

Nuk e meritoi atë mbret.

/QendraPress.com/