Çaste poetike me poetin:Asllan MIFTARI

BOTA NË DILEMË

————————

Në dilemë ndjehet bota sot

Nga një i çmendur, që pjell çdo ditë çmenduri

Me çmenduri kërcënon Paqen në botë

I çmendur që nuk ngjason me emrin njeri !

Vetëm një i çmendur, rrënon Paqen mbi Tokë

Rrënon qytete, vlera…, masakron gra e fëmijë

Shpirt zi, që kërcënon Lirinë në botë

I çmendur që kërkon, Perandori në këtë shekull të ri !

Nga një i çmendur, – Paqja në rrezik

Toka digjet, bëhet shkrumb e hi

Nga një bandit – vrasës, bota në panik

Vrasës i çmendur, i pa shembullt në histori !

Në ankth bota e njerëzimi sot

Në pasiguri e ankth të vërtetë

Një shpirt zi i etshëm për krime e mort

Provokon të ndez, Botëroren e Tretë !

Të mallkoj, nuk është në zakonin tim

Do thonë je bërë si mallkonjëset e këqija

Kur dëgjoj qyqen, që për lot nënash qan e vajton

Me zemër të them : – Vrasës të mallkoftë Perendia !

. Copyright@Asllan Miftari

Prill 2022

/www.QendraPress.com/